9.26.2011

味脆無窮的國際小廚~容記小菜王


又不是要下下出入酒店才是享受生活,有時同屋企人蒲腦場後,都可以在深水埗找到街坊風味的平民滋味,如容記的「揚名國際燒肉」就真的平靚正。
車水馬龍的人氣店,今已增開唔同的廳房。
因為腦場愈做愈旺,老區就多了街外客,口味亦不只得劉森記的竹昇麵,和維記甜美黃金豬膶湯粉,同老弟摸入橫街小巷,已感覺到街坊小廚容記的「人氣」,結果是未夠七點已經要乖乖跟隊拿位。


舊時為流水作業的兩層飯店,今天由土豪變軍閥,霸了半條街的舖位,情況就如附近的增輝同大牌檔愛民生,阿姐即場問兩位唔想等位可以選擇搭檯,來得平民飯堂當然唔介意,有得揀的服務是值得一讚。


配套就係咁街坊,一壺熱茶、一個盆用來洗碗筷。
入到「黃金廳」,檯上已mark好number,一檯坐上三幫人,一幫是街坊熟客,另一幫是跟著《米芝蓮》推介來的區外客,當然附近也有唔少「劈啤」的老粗,粗口橫飛,陣陣江胡味。


香江風情畫~
就如嘗傳統日本料理要到京都祇園,要見識「本土菜」就要鑽入小廚,而容記可說箇中「玩名」大師,「天下第一雞」、「乞兒身皇帝嘴」,千奇百怪的小炒,包你大開眼界。


小菜平均$68左右,招牌的燒肉最貴也是$128但可叫細例,價錢親民。
菜牌圖文並茂,叫菜不難,二人吃得不多,揚名國際燒肉、羅漢上素卷,還有老派菜焗魚腸我看都差不多了。

「揚名國際燒肉」,半例十件有多才賣$88,也難怪車胎人來作平靚正推介。
一般小廚沒有燒味爐,就算有燒味亦是「過大海」的進口品,菲律賓大廚懂得用西式焗爐,就引申出自家製燒肉,用上四層肥瘦相間靚腩肉,不但皮脆酥化,肉醃得鹹香鬆軟,是有誠意出品。

同檯的「食友」雖然怕腥,但我覺得又香又濃味道不錯。
傳統大牌檔焗魚腸是炸的,分別是蛋漿面較平,不會焗到漲起,即叫即製,炸起來面層香口熱辣,蛋餡濕潤又有魚腸甘香,雖然略油但好此道者也要一試。

有誠意自家製素菜卷。
木耳、鮑菇、筍絲處理後,釀入腐皮的羅漢上素卷是吃包紮功夫,在流水作業的小廚得見真有意思,餡料味道和口感豐富,唯香港人無芡不歡,腐皮掛上濃芡後變得不夠脆,是唯一扣分位。

寫單的靚女見大家share菜式還以為上錯菜,平水相蓬兜亂分享,也是小廚風味。
原以為一頓飯就此結束,我見菜式份量不少,於是建議同檯的客人一起分享,雖素未謀面,但五湖四海皆朋友,大家「貢獻」出部份菜式來一回「搭檯飯局」,吃中菜人多才是皇道。

他們分享的蒜香骨,蒜味普通,反而帶甜的汁醬和肉排一起走油,變得香口惹味,值得一試。
椒鹽鮮魷亦香口惹味。
人多才能試盡了炸、炒、焗的廚功,滿載而歸!

一輪「番外分享」,合共試了十道菜,大家各自埋單每人約$120,雖然是街坊菜,但味道粗中有細亦富創意,車胎人作平、靚、正推介,也有道理。

消費:$120(約)
滿意度:*** 1/2(以5*為滿分)
推介:以上菜式
建議人數:12
備:設最底消費$88/位、開瓶$50/枝、9pm後設宵夜優惠價


容記小菜王
地址:九龍深水埗福華街118-120號地下
電話:2387 1051

2 comments:

Fraz said...

公子,的確好人緣及受歡迎 :)
隨隨便便都可以埋班搞飯局...勁!!
下次或者試下電召(我)即到 :p

以撒 said...

皇上,熟能生巧嗟...哈哈!多人多雙筷,你來到梗係更好!